Útilokar ekki málefnasamning nýs meirihluta

Borgarstjóri útilokar ekki að gerður verði málefnasamningur milli meirihlutans í borginni á næstu vikum. Hann bendir þó á að fjárhagsáætlun sem hann mælti nýlega fyrir sé í raun málefnaskrá.

Sjálfstæðismenn hafa gagnrýnt núverandi meirihluta í borginni fyrir að hafa ekki enn gert málefnasamning. Í gærkvöldi var Dagur B. Eggertsson borgarstjóri gestur Sigmundar Ernis í þættinum Mannamáli. Þar var hann spurður út í hvort og þá hvenær meirihlutinn hygðist gera málefnasamning.

Dagur benti á að nýr meirihluti hefði tekið við á sérstökum tíma og hann hefði fengið ókaraða fjárhagsáætlun í fangið. Meirihlutinn hefði tekið þá ákvörðun að vinna sig í gegnum það út frá hverjum og einum málaflokki. Línur hefðu verið lagðar þar og því mætti segja að fjárhagsáætlunin væri ekki einungis málefnaskrá heldur væri búið að finna fé fyrir hvert einasta verk.

Aðspurður hvort þá væri ekki von á málefnasamningi sagði Dagur að hann myndi ekki útiloka það en bætti við: „Ég held að fólk gefi líka harla lítið fyrir þessi þunnu, stuttu plögg sem segja eiginlega ekki neitt, málefnasamning sem gengur út á það að gera áætlun um eitthvað."

Dagur sagði enn fremur: „Ég held að það sem nútímastjórnmál eiga að ganga út á er skýra sýn, skýra forgangsröðun og beinharðar ákvarðanir hugmyndir og þannig ætlum við að vinna."