Ekki króna til að bæta búsetuúrræði fatlaðra

„Ég myndi halda að bið eftir íbúðum fyrir fatlaða væri að minnka," segir Þór Þórarinsson, sérfræðingur hjá félagsmálaráðuneytinu. Hann segir að á næstu dögum muni Jóhanna Sigurðardóttir félagsmálaráðherra svara fyrirspurn um þetta mál á Alþingi. „Málin munu skýrast þá," bætir Þór við.

24 stundir greindu frá því í dag að Þröstur Sverrisson, einstæður faðir tvítugs pilts með Asperger-heilkenni og 12 ára stúlku, hefði um tveggja ára skeið reynt að finna búsetuúrræði fyrir son sinn en án árangurs. Hann segir að son sinn, Birki Frey, langi til að eignast eigið heimili. „Þegar ungt fatlað fólk vill stofna heimili ætti manneskja frá svæðisskrifstofu fatlaðra að setjast niður með því og foreldrunum og ræða hvað kæmi til greina, væri þjónustan eðlileg. Það er hún hins vegar ekki," er haft eftir Þresti í 24 stundum.

Það var Birkir J. Jónsson, þingmaður framsóknarflokksins, sem bar upp fyrirspurn til félagsmálaráðherra um búsetumál fatlaðra. Hann spyr meðal annars að því hversu margir séu á biðlista eftir húsnæði fyrir fatlaða og hversu mörg ný búsetuúrræði fyrir fatlaða, aðra en geðfatlaða, verði til árið 2008. „Það kom mér verulega á óvart þegar fjárlagafrumvarpið fyrir árið 2008 var skoðað að það var ekki gert ráð fyrir einni einustu krónu í að auka við búsetuúrræði fatlaðra," segir Birkir. „En ég trúi ekki öðru en að félagsmálaráðherra standi við þær miklu yfirlýsingar sem hún hefur gefið út," segir hann að lokum.