Jóhanna fer víða á kvennafrídegi

Í tilefni af kvennafrídeginum í dag, 24. október, er dagskrá félagsmálaráðherra þétt skipuð. Vinnudagurinn hefst á viðtölum í ráðuneytinu þar sem ráðherra hittir meðal annars fulltrúa frjálsra félagasamtaka.

Að því búnu heimsækir hún Stígamót og heldur þaðan til að flytja opnunarávarp á ráðstefnu í Keili á Reykjanesi sem ber yfirskriftina „Hvaðan kemur hræðslan við jafnrétti?". Ráðstefnan er haldin á vegum Háskóla Íslands í samstarfi við símenntunarmiðstöðvar, atvinnuþróunarfélög og tengslanet kvenna á landsbyggðinni og sent er út frá ráðstefnunni til annarra landshluta.

Síðan mun Jóhanna ásamt forsætisráðherra vera við afhendingu á fimm styrkjum úr Jafnréttissjóði og kynningu á niðurstöðum og framgangi þeirra áhugaverðu verkefna sem hlutu styrk úr sjóðnum á síðastliðnu ári. Félagsmálaráðherra afhendir Jafnréttisviðurkenninguna árið 2007 síðdegis.

Jóhanna lýkur svo kvennafrídeginum með því að ávarpa fund undir yfirskriftinni „Okkar hjartans mál" sem haldinn er á vegum Samfylkingarfélagsins í Reykjavík.

Félagsmálaráðherra hvetur konur til að vera meðvitaðar um stöðu sína og standa saman við að koma á jafnrétti kvenna og karla. „Þau baráttuorð sem hljómuðu í útvarpi og kvenna á meðal 24. október 1975 eiga enn við í dag. Þessi dagur er í mínum huga afar mikilvægur, minnir okkur á hvar við stöndum í jafnréttismálum og hvetur okkur til þess að ræða hvert við viljum stefna í framtíðinni", segir Jóhanna Sigurðardóttir félagsmálaráðherra m.a. í tilkynningu á vefsíðu stjórnarráðsins.