Foreldrar leikskólabarna mótmæla

Foreldrar leikskólabarna í Reykjavík ætla að afhenda formanni leikskólaráðs Reykjavíkur undirskriftalista á morgun. Um 2500 undirskriftum hefur þegar verið safnað að sögn Hildar Vernudóttur, meðstjórnanda í foreldrafélaginu Foldaborg.

Að sögn Sigurbjargar Söndru Guðnadóttur, formanns foreldrafélagsins á Foldaborg var, undirskriftunum safnað til að vekja athygli á manneklu starfsmanna innan leikskóla borgarinnar. Hún segir að foreldrar vilji hvetja borgaryfirvöld til þess að taka á málum til frambúðar í stað þess að leita að skammtímalausnum á hverju hausti.

Hún segir mikilvægt að laun starfsmanna á leikskólum verði bætt. Því að leikskólabörnin séu framtíðin sem þjóðfélagið ætli að byggja á.

Afhending undirskrifa fer fram á morgun klukkan 17 í porti gamla Miðbæjarskólans við Fríkirkjuveg 1.