Gjaldkeri grunaður um fjárdrátt á fleiri stöðum

Svæðisskrifstofa Vesturlands er nú að kanna fjárreiðurnar hjá Fjöliðjunni á Akranesi en grunur leikur á að ekki sé allt með felldu í bókhaldinu þar. Hefur Ríkisendurskoðun verið fengin til ráðgjafar af þeim sökum. Forstöðumaður Fjöliðjunnar er fyrrverandi gjaldkeri ÍA en félagið hefur kært hann fyrir fjárdrátt eins og kunnugt er af fréttum í Vísi.

Fjöliðjan er vinnustaður fyrir fatlaða á Akranesi og heyrir undir Svæðisskrifstofu Vesturlands. Magnús Þorgrímsson framkvæmdastjóri Svæðisskrifstofunnar baðst undan því að ræða málið að svo stöddu.

Þór Garðar Þórarinsson skrifstofustjóri hjá félagsmálaráðuneytinu segir að við hefðbundna skoðun á fjárreiðum Fjöliðjunnar í ár hafi þótt rétt að kalla eftir aðstoð Ríkisendurskoðunnar við yfirferð á fjárreiðunum. Það sé ekki venjulegt að svo sé gert.

Að öðru leyti segir Þór Garðar að nánar verði hægt að greina frá málavöxtum í næstu viku.

Vísir hafði samband við forstöðumanninn er fregnir bárust um fjárdráttinn sem til rannsóknar var hjá ÍA. Hann neitaði þá aðspurður staðfastlega að nokkuð væri að í fjárreiðunum hjá Fjöliðjunni.