Byrgisstúlka vinnur sjálfboðavinnu í sunnudagaskóla

Ólöf Ósk Erlendsdóttir, sem vakti athygli í fyrravetur, þegar hún sakaði Guðmund Jónsson í Byrginu um níðingsverk, starfar nú í sjálfboðavinnu í sunnudagaskóla í Grafarvogskirkju. Þetta kom fram í málflutningi í Héraðsdómi Reykjavíkur í morgun. Ólöf Ósk sætir ákæru vegna aðildar að líkamsárás.

Samkvæmt ákæru er Ólöfu gefið að sök að hafa ásamt fjórum öðrum karlmönnum ruðst inn í íbúð á heimili mannsins í janúar. Hún er sögð hafa blekkt hann til að hleypa sér inn og hleypt síðan vitorðsmönnum sínum inn. Í ákærunni kemur fram að tveir karlmannanna hafi þvingað fórnarlambið til að setjast á stól og Ólöf hafi síðan bundið hann fastan, keflað hann með munnkúlu með áfastri ól og sett leðurgrímu yfir höfuð hans. Tveir mannanna hafi síðan kýlt manninn í andlitið, sparkað í hann og annar þeirra hellt eldfimum vökva yfir hann. Manninum hafi síðan verið hótað frekari barsmíðum, að tennurnar í honum yrðu brotnar og borað yrði í hnéskeljar hans. Honum hafi einnig verið hótað að dælt yrði í hann úr sprautu þannig að hann hlyti bana af. Þá hafi honum verið ógnað með hnífi og hann barinn með járnstöng.

Ólöf játaði aðild sína að brotinu fyrir dómi. Hún sagðist hafa neytt fíkniefna með hléum frá því að hún var í grunnskóla. Hún hafi verið í mikilli neyslu á þeim tíma sem ráðist var á manninn en sé nú búin að vera edrú í um það bil tvo og hálfan mánuð. Hún sagðist vinna sjálfboðaliðsstarf í kirkjunni til að öðlast aftur traust almennings.

Þeir sem eru ákærðir fyrir aðild að líkamsrárásinni auk Ólafar eru Arnar Óli Bjarnason, Mikael Arnar Calhoun, Ragnar Ingi Arnarsson og Róbert Wayne Love.