Byggingarréttur á röngum forsendum

Með hagsmuni almennings að leiðarljósi vill Skipulagsstofnun vekja athygli á að auglýsing á vegum Kópavogsbæjar og Símans, sem birst hefur að undanförnu í fjölmiðlum um úthlutun á byggingarrétti fyrir íbúðarhús í Vatnsendahlíð í Kópavogi, byggir á röngum forsendum. Í auglýsingunni og á vefsíðunni kopavogurlodir.is, lítur út sem svæðið sé skipulagt fyrir íbúðarbyggð. Svo er ekki þar sem svæðið er skipulagt sem vatnsverndarsvæði.

"Áður en byggingarréttur fyrir íbúðarlóðir verður til þarf að auglýsa og kynna breytingu á gildandi skipulagi svæðisins. Á svæðinu er í gildi svæðisskipulag sem auk samþykkis Kópavogsbæjar er háð samþykki annarra sveitarfélaga á höfuðborgarsvæðinu. Jafnframt þarf Kópavogsbær að auglýsa tillögu að aðalskipulagsbreytingu og nýju deiliskipulagi fyrir svæðið. Breyting á svæðis- og aðalskipulagi svæðisins er einnig háð staðfestingu umhverfisráðherra. Lögformlegt skipulagsferli vegna íbúðarbyggðar í Vatnsendahlíð er ekki hafið." segir í tilkynningu frá Skipulagsstofnun

Smári Smárason skipulagsstjóri Kópavogsbæjar segir að sér komi þessi yfirlýsing Skipulagsstofnunnar á óvart. "Við höfum lagt fyrir Skipulagsstofnun ósk um breytingar á skipulaginu á þessu svæði," segir Smári í samtali við Vísi. "Og við tókum sérstaklega fram í þessum auglýsingum okkar að sá fyrirvari er á úthlutun að eftir á að samþykkja breytingu á deiliskipulaginu."

Skipulagsstofnun segir aftur á móti að þann 18. september sl. hafi hún gert formlega athugasemd við Kópavogsbæ vegna framangreindrar auglýsingar. "Þar sem Kópavogsbær hefur að engu haft þær athugasemdir sér Skipulagsstofnun sig knúna til að vekja athygli á málinu og upplýsa umsækjendur um að byggingarréttur sem nú er til úthlutunar og sölu í Vatnsendahlíð á sér ekki nauðsynlega lagastoð í skipulagi," segir í tilkynningunni.