Níu milljarða fjárhættuspil Reykjavíkurborgar

Gangi áætlanir Reykjavík Energy Invest eftir mun Orkuveita Reykjavíkur hafa skuldbundið sig í um 9,5 milljarða króna fjárfestingu á Filippseyjum í lok nóvember. REI hefur skuldbundið sig til þess að taka þátt í hlutafjárútboði á 40% hlut í jarðvarmafyrirtækinu PNOC-EDC sem er í meirihlutaeigu ríkisrekna olíufyritækisins PNOC.

Þessi 40% voru þegar fillipseyski hlutabréfamarkaðurinn lokaði í dag metin á um 56 milljarða króna. REI hefur skuldbundið sig til þess að kaupa um 45% af þessum hlut. Fjárfesting REI verður því, ef allt gengur eftir um 25 milljarðar. Orkuveita Reykjavíkur, sem er að um 95% hluta í eigu Reykjavíkurborgar, á 35,5% í REI og kemur því til með að leggja til rúmlega 9,5 milljarða króna í verkefnið.

Þessar tölur eru með þeim fyrirvara að PNOC-EDC seljist á markaðsvirði. Rúmlega 20 kaupendur eru með í spilinu og því óhætt að gera ráð fyrir að endanlegt kaupverð verði hærra. Og hlutur Reykvíkinga í dæminu meiri.

Aðspurður um þessa miklu fjárfestingu borgarbúa sagðist Vilhjámur Þ. Vilhjálmsson borgarstjóri ekki vera með allar tölur málsins á hreinu og benti á Guðmund Þóroddsson annan forstjóra REI. Vilhjálmur var hins vegar þess fullviss að REI myndi auka verðgildi sitt og Orkuveitunnar með fjárfestingum sínum erlendis.

Guðmundur Þóroddson forstjóri REI staðfesti að fyrirtækið væri þáttakandi í umræddu útboði en vildi ekki staðfesta þær tölur sem Vísir bar upp á hann. Þær tölur eru fengnar frá Kauphöllinni á Fillipseyjum.

Borgarfulltrúar Sjálfstæðisflokksins sem Vísir ræddi við í dag vildu ekki tjá sig um þessa fjárfestingu en frá því hefur verið greint í fjölmiðlum í dag að þeir séu ekki á eitt sáttir með útrásar- og fjárfestingastefnu Orkuveitunnar.

Björn Ingi Hrafnsson forseti borgarstjórnar og stjórnarmaður í REI er erlendis og því náðist ekki í hann vegna málsins.

Núverandi forseti Filipseyja, Gloria Arroyo, hefur verið ásökuð um spillingu og kosningasvindl síðan hún komst til valda árið 2001. Valdarán eru tíð í landinu og var síðast reynt að steypa stjórninn af kolli í mars á síðasta ári. Þá hafa stjórnvöld átt í átökum við hryðjuverkahópa í suðurhluta landsins.

Sérfræðingar sem Vísir ræddi við sögðu að þrátt fyrir ágætan vöxt efnahags landsins síðustu ár sé viðskiptaumhverfið á þar í landi alls ekki eins öruggt og best verður á kosið.