Fleiri fá að skila inn tillögum um nýjar höfuðstöðvar Landsbankans

Landsbankinn hefur ákveðið að fjölga þeim arkitektateymum sem taka munu þátt í samkeppni um hönnun og framkvæmd nýrra höfðustöðva bankans í miðbænum. Fram kemur í tilkynningu frá bankanum að upphaflega hafi staðið til að fá 12 arkitektateymi til þátttöku í fyrra þrepi samkeppninnar og bárust umsóknir frá 48 arkitektateymum frá 17 þjóðlöndum.

Í ljósi þess hve mikill fjöldi umsækjenda uppfyllti öll skilyrði til þátttöku var ákveðið að fjölga þátttakendum í 21 og eru þeir frá níu þjóðlöndum. Af þeim eru 13 teymi með íslenska arkitekta eða arkitektstofur innanborðs, þar af sex alíslensk teymi.

Í fyrra þrepi samkeppninar er gert ráð fyrir að þátttakendur setji fram hugmyndir að heildarskipulagi byggingarreits, tengingum við umhverfið og heildaryfirbragði bygginga. Tillögum á að skila fyrir nóvemberlok.

Sjö manna dómnefnd skipuð fulltrúum Landsbankans og Arkitektafélags Íslands velur svo fimm tillögur til þátttöku í síðara þrepi þar sem teymin vinna útfærslu og nánari tillögu að byggingum út frá þarfagreiningu Landsbankans. Miðað er við að það þrep hefjist fyrir miðjan desember og ljúki fyrir miðjan febrúar á næsta ári. Veglegt verðlaunafé verður veitt fyrir fyrsta og annað sæti og aðrir keppendur fá greidda ákveðna upphæð fyrir þátttöku.