Björgvin Halldórsson hefur verið fenginn til að halda tónleika í Cirkus í Kaupmannahöfn á vegum Hótelbókana í Kaupmannahöfn en það fyrirtæki stóð fyrir margrómuðum tónleikum með Stuðmönnum og Sálinni á sama stað í fyrra. Tónleikarnir verða haldnir þann 24. apríl næstkomandi eða á sumardaginn fyrsta.
Björgvin kom fram sem leynigestur á tónleikunum í fyrra og segir hann þá hafa komið til tals að hann myndi leiða næstu tónleika. Verkefnið leggst mjög vel í Björgvin og segir hann Cirkusbygginguna stórglæsilega. „Þetta er fimm stjörnu dæmi."
Björgvin mun taka megnið af því efni sem hann flutti á tónleikunum sem hann hélt í Laugardalshöll í fyrra. Hann mun mæta til leiks ásamt stórhljómsveit og Sinfóníuhljómsveit Konunglegu Óperunnar í Kaupmannahöfn. Þá munu nokkrir af fremstu dægurlagasöngvurum landsins koma fram og má þar nefna Stefán Hilmarsson, Svölu Björgvins, Siggu Beinteins, Eyjólf Kristjánsson og Regínu Ósk.
Tónleikarnir eru haldnir í samstarfi við Icelandair og fara fram undir borðhaldi í Cirkusbyggingunni sem rúmar 900 manns í sæti. Að sögn Björgvins er mikil eftirspurn eftir miðum en sala hefst á vefsíðu Icelandair innan skamms.
