Ráðist inn í sorg sjötugrar ekkju

Ekkja sem missti mann sinn fyrir þremur mánuðum fékk í vikunni senda könnun þar sem hún er meðal annars beðin um að svara spurningum um kynlíf sitt og áfengis- og lyfjanotkun eftir missinn. Ekkjan, sem er á sjötugsaldri, er enn í sárum eftir fráfall manns síns og segir dóttir hennar að könnunin beri vitni um fullkomið dómgreindarleysi af hálfu þeirra sem að henni standa. Könnunin er liður í lokaverkefni sálfræðinema en ábyrgðarmaður er sálfræðingur á öldrunarsviði Landspítalans.

„Hvernig getur fagfólki dottið í hug að ráðast inn í sorg fólks með þessum hætti," sagði dóttir ekkjunnar í samtali við Vísi. „Þessi könnun er einstaklega ósmekkileg og sýnir fullkomið dómgreindarleysi af hálfu þeirra sem að henni standa."

Dóttirin óskaði nafnleyndar þar sem móðir hennar vill ekki nafn sitt komi fram. Ekkjan hefur þegar sett sig í samband við Persónuvernd vegna könnunarinnar.

Könnnunin er liður í lokaverkefni Þóru Bjarkar Bjarnadóttur, sálfræðinema við háskólann í Árósum í Danmörku. Ábyrgðamaður hennar er hins vegar Berglind Magnúsdóttir, sálfræðingur á öldrunarsviði Landspítalans-háskólasjúkrahúss. Könnunin er 20 blaðsíður að lengd og spurningarnar á annað hundrað talsins. Þar er meðal annars spurt út í líðan viðkomandi eftir fráfall maka, lyfja- og áfengisnotkun og kynlíf. Með könnuninni er bréf þar sem fólki er boðið upp á áfallahjálp eftir að hafa svarað spurningunum. Í bréfinu kemur ennfremur fram að markmið rannsóknarinnar sé að kanna líðan fólks á aldrinum 65 ára og eldra sem misst hefur maka sinn á undanförnum vikum.

Þóra Björk Bjarnadóttir sagði í samtali við Vísi það ekki vera tilgang könnunarinnar að særa fólk. „Við vitum að þetta eru mjög erfiðir tímar hjá fólki og viðkvæmt mál. Við gengum í gegnum mikið ferli til að fá þetta samþykkt bæði hjá Persónuvernd og Vísindasiðanefnd."

Að sögn Þóru var könnunin send til 180 einstaklinga hér á landi. Fyrst til 90 einstaklinga í byrjun sumars og svo aftur nú í haust. Þóra segist ekki hafa fengið kvartanir hingað til. „Það eru hins vegar margir búnir að hringja í mig sem eru ánægðir með þetta."

Þá segir Þóra mikilvægt að senda könnunina snemma í sorgarferli fólks þar sem markmiðið er að greina vissa áhættuþætti hjá syrgjendum. „Þessi aldurshópur hefur verið yfirlitinn og því teljum við þetta vera mjög þarft verkefni. Við fengum meðal annars styrk frá Öldrunarráði."

Ekki náðist í Berglindi Magnúsdóttur við gerð fréttarinnar.