Pavarotti minnst um heim allan

Röð minningarathafna um stórtenórinn Luciano Pavarotti hefst þann sjötta október næstkomandi en þá verður liðinn mánuður frá því að söngvarinn lést úr briskirtilskrabbameini.

Sýningarnar fara fram í um 90 ítölskum menningarmiðstöðvum um heim allan og verða upptökur í eigu ítalska ríkissjónvarpsins meðal annars til sýnis. Þá verður boðið upp á ljósmyndasýningar, tónleika- og viðtalsupptökur.

Utanríkisráðherra Ítalíu segir í yfirlýsingu að markmiðið sé að miðla stærstu viðburðunum í lífi söngvarans til sem flestra. Pavarotti var ein skærasta stjarna Ítalíu fyrr og síðar og hafa plötur hans selst í meira en 100 milljónum eintaka um allan heim.