Vefmælir sýnir svifryk í borginni

Borgaryfirvöld hafa ákveðið að birta niðurstöður mælinga á svifryki með nýstárlegum hætti á heimasíðum Umhverfissviðs borgarinnar og Reykjavíkurborgar. Sérstakur vefmælir á síðunum mun sýna nýjustu niðurstöður á hálftíma fresti frá mælistöðinni við gatnamót Grensásvegar og Miklubrautar.

Eftir því sem fram kemur í tilkynningu frá Umhverfissviði mun vefmælirinn sýna þrenns konar merki sem ýmist lýsa góðum, miðlungs eða lélegum loftgæðum í borginni. Loftgæðamælingar hafa verið gerðar í Reykjavík í tvo áratugi og viðvaranir gefnar út ef líkur eru taldar á að svifryksmengun geti valdið þeim óþægindum sem eru með asma eða alvarlega hjarta- og lungnasjúkdóma.

Haft er eftir Gísla Marteini Baldurssyni, formanni umhverfisráðs, að með þessu sé ætlunin að gera upplýsingar um loftgæði notendavænar því loftmengun sé eitt af því sem borgarbúar hafi haft áhyggjur af og vilji draga úr.

Svifryk telst hafa farið yfir heilsuverndarmörk ef það mælist yfir 50 míkrógrömm á rúmmetra á sólarhring. Á árinu 2007 má svifryk fara 23 sinnum yfir mörkin en fram til ársins 2010 verða kröfur fyrir svifryk hertar þannig að á því ári má svifryk aðeins fara yfir heilsuverndarmörk sjö sinnum.