Samherji hættir skreiðavinnslu á Hjalteyri

Samherji hyggst loka skreiðavinnslu sinni á Hjalteyri við Eyjafjörð og missa á bilinu 8-10 manns vinnuna við það. Samherji hefur verið stærsti vinnuveitandinn í Arnarneshreppi og segir Axel Grettisson, oddviti hreppsins, að starfsmönnum hafi verið boðin vinna á Dalvík og akstur þangað, alla vega í vetur. Hins vegar sé óljóst hvort fólk taki því því margir í hópnum séu orðnir fullorðnir.

Aðspurður segir Axel að Samherji hafi gefið þær skýringar á lokuninni að þorskkvóti félagsins hafi minnkað í kjölfar niðurskurðar sjávarútvegsráðherra fyrr á árinu. „Þeir ætla sér að fara að vinna fiskinn þannig að þeir sem fái sem mest fyrir hann," segir Axel.

Samherji hefur leigt húsnæði af Arnarneshreppi og á Axel von á að þeim leigusamningi verði sagt upp og hreppurinn verði þannig af þeim tekjum. Hann á von á að fundað verði með fulltrúum Samherja vegna málsins í næstu viku þar sem fjallað verði um leigusamninginn. Verði honum sagt upp muni hreppsnefndin einhenda sér í að leita að atvinnuskapandi starfsemi í húsnæðið. Axel segir tvær fyrirspurnir þegar hafa borist vegna húsnæðisins en hann vill ekki tjá sig frekar um það fyrr en málum Samherja sé lokið.

Í Arnarneshreppi búa 176 manns og aðspurður hvort hann óttist fólksflótta segir Axel að hreppsnefndarmenn viti ekki hvað muni gerast. „Við vorum að auglýsa nýjar lóðir á Hjalteyri og það er ljóst að þessi ákvörðun kemur ekki á góðum tímapunkti hvað það varðar," segir Axel.