Óheimilt að krefjast viðbótargreiðslu vegna gengislækkunar

Samgönguráðuneytið hefur staðfest úrskurð Neytendastofu um að Heimsferðum hafi verið óheimilt að krefja mann um viðbótargreiðslu fyrir ferð sem hann keypti hjá fyrirtækinu vegna gengislækkunar krónunnar.

Kvörtun barst Neytendastofu frá neytanda í fyrra. Hann var krafinn um rúmlega 13 þúsund krónur í viðbótargreiðslu vegna gengislækkunar krónunnar á þeim fjórum mánuðum sem liðu frá því að hann pantaði ferð og þar til að hann kláraði að borga ferðina.

Fram kemur í tilkynningu frá Neytendastofu að almenna tilvísun vegna gengislækkunar hafi verið að finna í skilamálum ferðaskrifstofunnar en hins vegar var ekki tilgreint hvernig að verðhækkunin skyldi reiknuð út. Þá gat ferðaskrifstofan ekki sýnt fram á með hvaða hætti hækkunin var fundin út.

Neytendastofa taldi því að um brot á lögum um alferðir að ræða. Við þann úrskurð sættu Heimsferðir sig ekki og leituðu til æðra stjórnsýslustigs, samgönguráðuneytisins, með hann. Ráðuneytið staðfesti hins vegar úrskurð Neytendastofu.

Í tilkynningu Neytendastofu kemur fram að í niðurstöðu ráðuneytisins og Neytendastofu sé Heimsferðum bent á að orða skilmála sína með skýrari hætti og tilgreina nákvæmlega hvernig verðbreytingar séu reiknaðar og við hvaða gengi er miðað þannig að uppfyllt séu ákvæði alferðarlaga. Jafnframt beinir Neytendastofa því til ferðaskrifstofa að breyta almennum ferðaskilmálum sínum á sama hátt. Hefur þessari ábendingu verið komið á á framfæri til Samtaka aðila í ferðaþjónustu.