Raunveruleikaþáttum í Kína settar skorður

Kínversk stjórnvöld hafa sett raunveruleikaþáttum í sjónvarpi ströng skilyrði. Almenningskosningar í gegnum internet, síma eða símaskilaboð hafa verið bannaðar. Þá þurfa keppendur að vera heilbrigðir og þroskaðir og kynnar keppninnar mega ekki gefa hvor öðrum undir fótinn né vera með niðrandi athugasemdir.

Raunveruleikaþátturinn Super Voice Girls hefur notið gífurlegra vinsælda í Kína en hann er eftirmynd Pop Idol. Nú verður þátturinn ekki lengur sýndur á besta tíma heldur verður færður til í dagskránni til að draga úr áhorfi.

Ástæðan er sú að stjórnvöld telja þáttinn og aðra líka hafa slæm áhrif á unglinga. Framvegis verður gerð sú krafa á framleiðendur að þeir velji keppendur sem geta verið góðar fyrirmyndir. Þá hafa reglur um klæðaburð og hárgreiðslur einnig verið hertar og má klæðnaður ekki vera ögrandi.