Dóttir Brynjólfs fær vænan bita

Kristjana Thors Brynjólfsdóttir hefur tekið við verkefnum hjá Skjá einum sem Björn Þ. Sigurðsson fyrrverandi sjónvarpsstjóri sinnti áður. Björn lét af störfum á föstudag. Athygli vekur að Kristjana er dóttir Brynjólfs Bjarnasonar forstjóra Símans, móðurfélags Skjás eins.

Töluverðar skipulagsbreytingar virðast vera á Skjá einum því Sigríður Margrét Oddsdóttir, framkvæmdastjóri Já og Skjásins, er nú titluð sjónvarpsstjóri. Hún segir alls ekki rétt að stilla málum þannig upp að Kristjana hafi verið ráðin vegna faðernis hennar. „Kristjana á hvorki að njóta þess að vera dóttir Brynjólfs Bjarnasonar né að líða fyrir það. Málið er einfaldlega að það þurfti að sinna ákveðnum verkefnum við dagskrárstjórn þegar Björn Þór hætti. Kristjana var talin hæfust til að sinna þeim, " segir Sigríður Margrét.

Sigríður Margrét segir að vetrardagskrá Skjás eins sé að fara í loftið og vinsælustu þættirnir verði þar áfram auk nýrra skemmtilegra sjónvarpsþátta. „En við erum með í framleiðslu nýjan íslenskan spurningaþátt sem heitir Ertu skarpari en skólakrakki, sem verður á vetrardagskránni," segir Sigríður Margrét.