Tveir gistu fangageymslur á Suðurnesjum í nótt

Erill hefur verið hjá lögreglu á Suðurnesjum um helgina. Tveir gistu fangageymslur lögreglunnar þar í bæ í nótt, annar vegna ölvunar og óláta á skemmtistað og hinn er grunaður um líkamsárás. Er það mál í rannsókn.

Þrír gistu fangageymslur lögreglunnar á Suðurnesjum í fyrrinótt eftir að hafa verið stöðvaðir af lögreglunni á höfuðborgarsvæðinu fyrr um kvöldið. Mennirnir höfðu tekið bíl af bílasölu í Reykjanesbæ ófrjálsri hendi og voru stöðvaðir á henni. Þeir höfðu einnig skipt um skráningarplötur á bifreiðinni. Málið er í rannsókn.

Bíll valt á Vatnsleysustrandarvegi seinni partinn í gær, nærri nýju gatnamótunum á Reykjanesbrautinni. Ökumaðurinn var fluttur á Heilbrigðisstofnun Suðurnesja til skoðunar og er hann jafnframt grunaður um ölvun við akstur.

Maður á bifhjóli féll í götuna á línuvegi Hitaveitu Suðurnesja að Svartsengi í gær. Hann var fluttur á Heilbrigðisstofnun Suðurnesja til skoðunar. Ökumaðurinn reyndist lítillega meiddur og við athugun hafði hann ekki réttindi til að aka hjólinu.

Þá var umferðarslys á Reykjanesbraut í gær við Grænásgatnamótin þar sem fólksbíll og jeppabifreið lentu í hörðum árekstri. Erfiðlega gekk að ná ökumanninum úr fólksbílnum og þurfti tækjabíl frá Brunavörnum Suðurnesja til að ná manninum út úr bifreiðinni. Reykjanesbrautinni var lokað um tíma vegna þessa en meiðsl mannsins eru ekki kunn.