Rannsaka hvort aukning á vatnsmagni hafi átt þátt í slysi í Soginu

Lögreglan á Selfossi rannsakar nú hvort breyting á vatnsrennsli í Soginu þegar meira vatni var hleypt í gegnum Írafossvirkjun hafi haft áhrif á það að mennirnir sem voru þar á veiðum á miðvikudag féllu í ána. Annar mannanna komst við illan leik til lands en hinn er látinn.

Eins og fram hefur komið í fréttum þá voru mennirnir tveir, feðgar, að veiðum í Soginu á miðvikudag þegar sonurinn missti fótanna og féll í ána. Faðirinn reyndi þá að bjarga syni sínum en fór sjálfur á flot. Bændur á Bíldsfelli, sem er bær þarna rétt hjá, björguðu syninum en faðirinn fannst látinn í gær.

Lögreglan á Selfossi rannsakar nú hvort orsök slyssins megi rekja til þess að breytingar hafi orðið á vatnsrennsli árinnar.

Eins og sjá má á línuriti vatnamælinga Orkustofnunar frá því á miðvikudag þá eykst rennsli Sogsins upp úr klukkan fjögur þann dag fram til klukkan sex en einmitt á þeim tíma voru feðgarnir að veiðum í ánni. Það er næstum 10 prósent aukning sem af þeim sem vel þekkja til er þónokkuð.

Landsvirkjun staðfestir að rennsli hafi verið aukið í gegnum vélar Írafossvirkjunar skömmu áður en slysið varð til að auka raforkuframleiðslu. Við það hafi vatnyfirborðið hækkað um 6 sentimetra á slysstaðnum.

Páll Þór Ármann, framkvæmdarstjóri Stangveiðifélags Reykjavíkur, sem sér um útleigu á veiðileyfum í Soginu sagði í samtali við fréttastofu að þekkt sé að menn lendi í vandræðum þegar vatnsmagn er aukið í ánni. Öll breyting á vatnshæð og vatnsrennsli hafi áhrif á menn sem standa úti í miðri á, með vatn upp að mitti.

Hjá Landsvirkjun fengust þær upplýsingar að strax og slysið hafi átt sér stað var farið í að athuga hvort eitthvað óeðlilegt hefði átt sér stað af hálfu við Írafossvirkjun. Sú athugun leyddi það í ljós að í einu og öllu hafi verið farið að settum reglum.