Þrennt í haldi lögreglu

Tveir karlmenn og ein kona eru í haldi lögreglu, grunuð um smygl á kókaíni frá Bandaríkjunum. Sérsveit lögreglu réðst til inngöngu í hús í Laugarneshverfi í gærkvöld og handtók fólkið.

Það var um kvöldmatarleytið í gærkvöldi sem fjöldi sérsveitarmanna og óeinkennisklæddra lögreglumanna réðust inn í hús í Laugarneshverfi, að sögn sjónarvotta, búnir alvæpni og gerðu þar húsleit. Í kjölfarið voru tveir karlmenn og eina kona handtekinn og flutt á lögreglustöð til yfirheyrslu. Samkvæmt heimildum er þau grunuð um að hafa flutt inn talsvert magn af kókaíni til landsins frá Bandaríkjunum. Þá var lögregla búin að fylgjast með húsinu daglangt áður en hún lét til skarar skríða.

Málið tengist, að sögn lögreglu, ekki fíkniefnamálinu sem upp kom á Fáskrúðsfirði á fimmtudag. Að öðru leyti vildi hún lítið segja um málið annað en það að hún staðfestir að fólkið sé í haldi grunað um innflutning á eiturlyfjum,

Heimildir fréttastofu telja líklegt að krafist verði gæsluvarðhalds yfir fólkinu síðar í dag. Þá muni lögregla senda frá sér tilkynningu um málið þar sem skýrt verði frekar frá því.