Aðgerðaáætlun gegn manneklu á leikskólum

Bæjarráð Kópavogs hefur samþykkt að veita tveimur leikskólum aukið fjárhagslegt og faglegt sjálfstæði í tilraunaskyni til þess að auka stöðugleika í starfsmannahaldi leikskólans og laða starfsfólk að leikskólum.

Þetta er meðal tillagna sem finna má í nýrri aðgerðaáætlun sem leikskólanefnd bæjarins lagði til. Eins og kunnugt er hafa bæjaryfirvöld í Kópavogi glímt við manneklu á leikskólum og var því ákveðið að reyna að ráða bót á vandanum.

Með aðgerðaáætluninni fá starfsmenn leikskóla aukin tækifæri til náms í leikskólafræðum og aukið faglegt öryggi í starfi og þá verður leikskólastjórnendum gert kleift að sækja stjórnunarnám sem er sérsniðið að þörfum þeirra. Enn fremur á að bæta vinnuaðstöðu og námskeið sem miða m.a. að því að draga úr streitu. Enn fremur er gert ráð fyrir kjarabótum eins og auknum greiðslum vegna kostnaðar í starfi og námsstyrkir. Þá verður erlendum starfsmönnum boðið íslenskunámskeið á vegum bæjarins.

Fram kemur í tilkynningu frá Kópavogsbæ að til viðbótar hafi verið samþykkt að greiða viðbótarlaun til leikskólakennara vegna aukins álags. Enn fremur hóf Kópavogsbær heimgreiðslur til foreldra barna undir tveggja ára aldri í nóvember í fyrra. Bæjarráð Kópavogs samþykkti í gær að fella niður aldursmörkin og framlengja heimgreiðslur til þess tíma að börn fá inni á leikskóla.