TSH fær ekki bætur vegna Rúgbrauðsgerðarinnar

Hæstiréttur staðfesti í dag dóm Héraðsdóms Reykjavíkur í máli sem Trésmiðja Snorra Hjaltasonar höfðaði á hendur íslenska ríkinu í tengslum við fasteignakaup. Trésmiðjan keypti húseigina að Borgartúni 6, sem oft hefur verið nefnd Rúgbrauðsgerðin, af íslenska ríkinu.

Í kaupsamningi kom fram að húsið væri 5.210 fermetrar að stærð samkvæmt skrám Fasteignamats ríkisins en við mælingu kom í ljós að húsið var aðeins 4.735 fermetrar eða tæplega tíu prósentum minni en uppgefið var.

Fór Trésmiðjan því fram á skaðabóta vegna þess en afsláttar af kaupverðinu vegna þessa mismunar til vara. Krafan um skaðabætur var byggð á því að Trésmiðjan hefði þurft að greiða hærri opinber gjöld vegna breytinga sem leiddu til stækkunar húsnæðisins.

Hæstiréttur hafnaði þessu hins vegar á þeim grundvelli að ekki væri við starfsmenn ríkisins að sakast. Forsvarsmenn ríkisins hefðu greint frá því að stærðarmismuninn mætti rekja til breyttra reglna um útreikning á stærð húseigna.

Þá benti Hæstiréttur á að forsvarsmaður Trésmiðjunnar, sem skoðað hefði húsið, væri byggingafróður og húseignin hefði verið lengi í eigu ríkisins. Forsvarsmaðurinn hefði því átt að gera sér grein fyrir að athuga þyrfti upplýsingar um stærð eignarinnar. Því hefði Trésmiðjan ekki sýnt fram á að eignin hefði í þessum viðskiptum verið haldin galla sem gæfi félaginu rétt til skaðabóta eða afsláttar. Var íslenska ríkið því sýknað af kröfu Trésmiðju Snorra Hjaltasonar.