Kaurismäki væntanlegur á Alþjóðlega kvikmyndahátíð í Reykjavík.

Finnski kvikmyndaleikstjórinn Aki Kaurismäki er væntanlegur á Alþjóðlega kvikmyndahátíð sem haldin verður í Reykjavík dagana 27. september til 7. október. Hann mun veita sérstökum verðlaunum viðtöku fyrir framúrskarandi listræna kvikmyndasýn.

Kaurismäki hefur gert fimmtán myndir í fullri lengd en er hvað þekktastur fyrir Finnlands-þríleikinn sem samanstendur af Ský á reiki (1996), Maður án fortíðar (2002) og Ljós í húminu (2006). Í tilefni af komu Kaurismäkis verður Finnlands-þríleikurinn sýndur í heild sinni á Alþjóðlegri kvikmyndahátíð.

Á dagskrá hátíðarinnar verða 87 myndir frá 30 löndum. Til hægðarauka er dagskránni skipt upp í nokkra flokka og eru stærstu flokkarnir, Vitranir, Fyrir opnu hafi og Heimildamyndir. Upplýsingar um miðasölu má nálgast hér.