Hafdís Huld prýðir forsíðu London tourdates

Hin geðþekka söngkona Hafdís Huld er á forsíðu nýjasta tölublaðs London tourdates með fyrirsögninni: Hafdís Huld Madonna with banjo. Blaðinu er dreift frítt á tónleikastöðum og í verslunum í London og í því er að finna upplýsingar um þá tónleika sem eru í boði í borginni hverju sinni.

Í nýjasta tölublaðinu er viðtal við Hafdísi þar sem hún spjallar um gullgalla og þorramat. Þá er fjallað um tónleika hennar á Reykjavík Nights in London þann 26. september næstkomandi sem miða að því að kynna hljómsveitir sem koma til með að spila á Iceland Airwaves um miðjan október næstkomandi.

Þá er einnig talað almennt um Reykjavík Nights in London en markmið tónleikanna sem haldnir eru á tveggja mánaða fresti er að skapa vettvang fyrir tónlistarmenn á Norðurlöndunum til að koma sér á framfæri í Bretlandi og víðar.