Lohan hjónadjöfull

Stephanie Allen, eiginkona hins 39 ára Tony Allen úr hljómsveitinni Dead Stays Alive, segir Lindsay Lohan hafa eyðilagt hjónaband þeirra. Þau Tony og Lohan eru sögð hafa stundað kynlíf á salerni meðferðarstofnunar í Utah sem bæði hafa dvalið á um skeið. Stephanie hefur í kjölfarið hent bónda sínum út en þau eiga saman átta mánaða tvíbura.

Vinkona segir Stephanie eyðilagða en hún og Tony hafa reynt að eignast börn um langt skeið. „Stephanie hefur bæði gengið í gegnum glasafrjóvganir og fósturlát en nýlega eignaðist hún tvíbura," segir vinkonan. Hún mun vera miður sín yfir því að einmitt núna hafi Tony tekið upp á því að sænga hjá smástelpu.

Tony neitar sök og segir að hann og Lohan séu einungis vinir. „Við erum góðir vinir og eigum margt sameiginlegt. Við spjöllum mikið um lífið og tilveruna," sagði hann í viðtali við sjónvarpsþáttinn Extra.

Hann mun þó hafa sagt annað við vini sína. „Halló þetta er nú einu sinni Lindsay Lohan. Hefðuð þið ekki gert það sama?"

Stephanie er komin af efnamiklu fólki en fjölskylda hennar stofnaði Linpac packaging sem framleiðir vörur fyrir McDonald's.