Lohan öll að koma til

Tony Allen sem dvaldi um tíma með Lindsay Lohan á Cirque Lodge meðferðarheimilinu í Utah segir að hún sé öll að koma til. Í viðtali við sjónvarpsþáttinn Extra segir hann sterk vináttubönd hafa myndast á milli hans og Lohan í meðferðinni. "Við erum mjög góðir vinir, höfum sameiginleg áhugamál og spjölluðum mikið um lífið og tilveruna. Hún er mjög heilbrigð og jákvæð og vill koma öðrum þannig fyrir sjónir."

Eins og kunnugt er var komið að þeim skötuhjúum þegar þau voru að stunda kynlíf inni á salerni meðferðarstofnunarinnar fyrir skömmu svo ljóst er að eitthvað meira en vinátta ríkir á milli þeirra

Allen sem er meðlimur í hljómsveitinni Dead Stays Alive segir þau bæði mikla tónlistarunnendur og að það hafi tengt þau saman strax í upphafi.