Samgönguvika sett í borginni

Samgönguvika Reykjavíkurborgar var sett með formlegum hætti í Perlunni í dag þar sem jafnframt voru veitt verðlaun í Kappakstrinum mikla sem fram fór í borginni í síðustu viku.

Það var Gísli Marteinn Baldursson, formaður umhverfisráðs, sem setti samgönguvikuna og afhenti hverfinu Miðborg/Hlíðar Samgöngublómið. Í því felst að í hverfinu verður unnið að ýmsum verkefnum tengdum samgöngum í samvinnu við skóla, hverfisráð, foreldrafélög og ýmis fyrirtæki og stendur verkefnið fram að næstu samgönguviku eftir ár. Þá verður afrakstur vinnunnar opinberaður.

Í samgönguvikunni verður boðið upp á alls kyns fyrirlestra og fundi sem snúa að samgöngum og þá munu tónlistarmenn troða upp í strætisvögnum. Vikunni lýkur svo næstkomandi laugardag með hóphjólreiðum úr hverfum borgarinnar niður í Nauthólsvík og þaðan í Ráðhúsið. Þar fer svo fram hin árlegi Tjarnarsprettur sem er hjólreiðakeppni þar sem hjólað er í kringum Tjörnina.

Í Perlunni voru jafnframt veitt verðlaun í Kappakstrinum mikla sem Orkuveita Reykjavíkur hélt í samstarfi við Verkfræðistofnun Háskóla Íslands á fimmtudaginn. Ólíkt hefðbundnum kappökstrum var ekki markmiðið að aka sem hraðast heldur að nota sem minnsta orku á tiltekinni leið. Leiddir voru saman á fjórða tug umhverfisvænna bíla sem ýmist ganga fyrir etanóli, rafmagni, metani, dísilolíu eða bensíni. Alls var keppt í níu flokkum og veitti Kristján L. Möller samgönguráðherrra þeim hlutskörpustu verðlaunin.