Vilja láta reka heilu innflytjendafjölskyldurnar úr landi

Stærsti stjórnmálaflokkur Sviss hefur boðað mjög umdeilda lagasetningu sem gerir yfirvöldum kleift að senda heilu innflytjendafjölskyldurnar úr landi gerist einn fjölskyldumeðlimurinn brotlegur við lög.

Þjóðaratkvæðagreiðslu þarf til svo lögin geti tekið gildi en Svissnesski þjóðarflokkurinn hefur legið undir miklum ámæli vegna málsins og er sakaður um kynþáttahatur.

Ef lögin ná fram að ganga verður hægt að reka heilu fjölskyldurnar úr landi gerist einhver þeirra brotlegur við lög. Glæpirnir sem um ræðir eru ofbeldis- og fíkniefnaglæpir og bótasvik. Ekkert land í Evrópu hefur sett lög af þessu tagi en nasistar í Þýskalandi fyrir stríð komu á svipuðum lögum. Á plakati sem flokkurinn hefur látið gera er mynd af þremur hvítum kindum að sparka út svartri kind og er slagorðið: „Til öryggis". Flokkurinn heldur því fram að innflytjendur séu fjórum sinnum líklegri til þess að fremja glæp en innfæddir Svisslendingar.

Formaður flokksins, Uli Maurer segir að flokksmenn séu þeirrar skoðunnar að foreldrar beri ábyrgð á börnum sínum. „Ef þeir geta ekki alið þau upp á réttan hátt verða þeir að taka afleiðingunum. " Flóttamannanefnd Sameinuðu þjóðanna hefur þegar lýst því yfir að lögin brjóti í bága við flóttamannasáttmála SÞ og að þau stangist einnig á við mannréttindastefnu Evrópusambandsins og raunar stjórnarskrá Sviss.

Flokkurinn reynir nú að afla þeirra 100 þúsund undirskrifta sem þarf til að vísa málinu í þjóðaratkvæðagreiðslu.