Vildi láta lögguna hræða strákinn

Lögregla var kölluð að heimili í borginni í gær vegna ófriðar sem orsakaðist af því unglingnum á heimilinu var meinað að fara á MSN í tölvunni. Að sögn lögreglu hefur tilfellum af þessu taginu fjölgað. Móðir unglingsins bað lögregluna um að „hræða" soninn, en við því var ekki orðið enda ekki í verkahring embættisins að sögn lögreglu.

Síðdegis í gær voru lögreglumenn kallaðir að heimili á höfuðborgarsvæðinu en þar hafði kastast illilega í kekki hjá móður og syni hennar á unglingsaldri. „Málavextir voru á þá leið að strákurinn hugðist vera í MSN í tölvunni en það er velþekktur samskiptamáti á netinu," segir í tilkynningu frá lögreglu. „Móðirin hafði hins vegar falið honum það hlutverk að taka leirtauið úr uppþvottavélinni. Þeim tókst ekki að ná samkomulagi um að forgangsraða hlutunum og svo fór að strákurinn missti stjórn á skapi sínu. Hann skemmdi eitthvað af húsgögnum á heimilinu og fór svo út í fússi."

Drengurinn var því ekki heima þegar lögreglu bar að garði en móðirin bað lögreglumenn um að hræða strákinn, ef það væri til þess fallið að hann bætti ráð sitt. „Til þess kom ekki enda er það tæpast hlutverk lögreglunnar," segir að lokumk í tilkynningunni.