Fresta tillögu um hlutafélagavæðingu vegna orða minnihlutans

Stjórn Orkuveitu Reykjavíkur samþykkti það á fundi sínum fyrir stundu að beina því til eigenda fyrirtækisins, Reykjavíkurborgar, Akranesbæjar og Borgarbyggðar, að hlutafélagavæða fyrirtækið. Það er nú sameignarfélag.

Samþykkt var að fresta því að afgreiða tillöguna en samþykkt að senda hana fjölmiðlum þar sem fjarstaddir aðalmenn í stjórn, sem þó höfðu boðað varamenn sína, hefðu kosið að gera hana tortryggilega eins og segir í tilkynningu frá fyrirtækinu. Fyrr í dag gerðu Dagur B. Eggertsson og Svandís Svavarsdóttir, fulltrúar Samfylkingarinnar og Vinstri - grænna í stjórn Orkuveitunnar, athugasemdir við að málið væri tekið fyrir án undangenginnar umræðu.

Enn fremur kemur fram í tilkynningu Orkuveitunnar að fundur hafi verið boðaður í stjórn Orkuveitunnar á mánudaginn kemur vegna málsins.

Ekki verður einkavætt

Meririhlutinn í stjórn Orkuveitunnar lét bóka að verði tillagan samþykkt felist í því sóknarfæri fyrir Orkuveitu Reykjavíkur, hér á landi sem erlendis en engin áform séu hjá núverandi eigendum um sölu á eignarhlutum sínum. „Engar tillögur liggja fyrir um einkavæðingu fyrirtækisins og verða ekki fluttar af núverandi stjórn," segir í bókuninni.

Í bókuninni segir enn fremur að núverandi sameignarfélagsform leggi óþarflega miklar ábyrgðir á eigendur fyrirtækisins um leið og skýr merki séu um að það sé farið að verða Orkuveitunni fjötur um fót í rekstri sínum, sérstaklega þeim hluta hans sem er á samkeppnismarkaði. Meirihlutinn segist enn fremur munu beita sér fyrir málefnalegri umræðu á vettvangi sveitarstjórnanna og öðrum opinberum vettvangi um rekstrarform fyrirtækisins.

Þá segir í tilkynningu Orkuveitunnar að vegna yfirlýsingar Dags B. Eggertssonar og Svandísar Svavarsdóttur varðandi undirbúning stjórnarfundar Orkuveitunnar sé rétt að það komi fram að:

· Rekstrarform Orkuveitu Reykjavíkur er málefni sem er á ábyrgð eigenda fyrirtækisins og löggjafans.

· Tillagan, sem lögð var fram á fundi stjórnar OR í dag, felur í sér tilmæli til eigenda um að taka málið upp á sínum vettvangi.

· Eðli málsins samkvæmt koma tilmæli stjórnar OR til kasta þeirra Dags B. Eggertssonar og Svandísar Svavarsdóttur

o í borgarráði Reykjavíkur

o í borgarstjórn Reykjavíkur

o á eigendafundi Orkuveitu Reykjavíkur.

Möguleikar kjörinna fulltrúa til að taka þátt í þeirri opinberu umræðu sem nauðsynleg er um rekstrarform Orkuveitu Reykjavíkur séu því miklir.