Dónaskapur að láta íbúana ekki vita af heræfingunni

Einar Örn Thorlacius sveitarstjóri Hvalfjarðarsveitar segir að hvorki sveitarstjórn, íbúar né lögregla í Hvalfirði hafi verið látin vita af sprengjueyðingaræfingunni Northern Challenge sem hófst í gærmorgun. "Þetta er hreinn dónaskapur að senda okkur ekki einu sinni fax eða tölvupóst um að þetta stæði til," segir Einar Örn.

Æfingin fer að mestu fram innan og við nýja öryggissvæðið á Keflavíkurflugvelli en einnig í Hvalfirði. Á miðvikudag, 5. september, verður æft í Hvalfirði, en þá munu varðskip og þyrla taka þátt í æfingunni ásamt öðrum þátttakendum.

Einar Örn segir að fyrir utan að enginn í sveitarfélaginu hafi verið látinn vita megi benda á að utanríkisráðuneytið hafi ákveðið að varnarsvæðið í Hvalfirði skyldi tekið í borgaraleg not frá og með 10. nóvember á síðasta ári og hafi forræðið yfir svæðinu þá verið flutt til fjármálaráðuneytisins.

"Nú loks hefur fjármálaráðuneytið ákveðið að selja svæðið og eigurnar sem standa að því og við munum eiga fund með ráðuneytismönnum á morgun um það mál," segir Einar Örn. "Svæðið er sem sagt ekki lengur á forræði utanríkisráðuneytisins."

Einar segir að áður en svæðið komst á forræði fjármálaráðuneytisins hafi sveitarstjórn, íbúar eða lögreglan í Borgarfirði aldrei fengið vitneskju um heræfingar af þessum toga í Hvalfirði. "Slík framkoma finnst okkur fyrir neðan allar hellur og við munum væntanlega taka upp málið við stjórnvöld," segir Einar Örn.