Krakkar úr Kópavogi heimsmeistarar í skák

Skáksveit Salaskóla sigraði í flokki 14 ára og yngri á heimsmeistaramóti í skák sem lauk í Tékklandi í morgun. Þegar lokaumferð á mótinu hafði verið tefld voru Íslendingarnir með einn og hálfan vinning í forskot á næstu sveit. Alls tefldu 10 sveitir allar við alla og þar af voru 6 sveitir í flokki 14 ára og yngri. Íslensku þátttakendurnir segja að keppnin hafi verið mjög skemmtileg en aðstæður erfiðar því mikill hiti er í Tékklandi þessa dagana.

Skáksveit Salaskóla skipa Guðmundur Kristinn Lee, Páll Andrason, Patrekur Maron Magnússon, Jóhanna Björg Jóhannsdóttir og Birkir Karl Sigurðsson. Liðstjórar eru Hrannar Baldursson og Tómas Rasmus.