Ökumaður sinnti ekki stöðvunarmerkjum lögreglu

Borgarneslögreglan veitti ökumanni eftirför um Hvalfjörð á sjötta tímanum í kvöld. Maðurinn var mældur á 116 á 90 kafla í Hafnarskógi. Hann sinnti ekki stöðvunarmerkjum lögreglu og reyndi að keyra á lögreglubifreið og í veg fyrir hana. Að sögn Borgarneslögreglunnar keyrði maðurinn inn í Hvalfjörðin og keyrði þá á 150 kílómetra hraða á einum kafla. Lögreglubílar frá Akranesi og Reykjavík óku á móti manninum og lokuðu veginum á brúnni við Laxá í Kjós, þar sem maðurinn var stöðvaður.

Mikil mildi þykir að enginn hafi slasast í eftirförinni. Lögreglan þurfti að brjóta rúðu í bifreið ökumannsins til að ná honum út úr bílnum. Ökumaðurinn er ekki grunaður um ölvunarakstur eða lyfjaakstur. Skýringin sem maðurinn gaf á því að hafa ekki sinnt stöðvunarmerkjum lögreglu var sú að hann hefði verið tekinn fyrir of hraðann akstur fyrir nokkrum dögum og vildi ekki að það endurtæki sig.