Tennis stúlkan kemur aftur

Eitt vinsælasta plakat allra tíma, Tennis stúlkan, hefur ekki verið fáanlegt í 25 ár. Nú verður það endurútgefið í takmörkuðu magni á sama tíma og Wimbledon tennismótinu er að ljúka.

Plakatið er af ungri ljóshærðri stúlku í tennis sem strýkur á sér beran bossann. Það seldist eins og heitar lummur þegar það var fyrst gefið út árið 1976 og eintök seljast nú á Ebay á um 40 þúsund krónur.

Myndin af stúlkunni er ein mest birta ljósmynd í heiminum og ekki minni menn en Ricky Gervais hafa gert nákvæma endurgerð.

Margir ljósmyndarar hafa sagst hafa tekið myndina og enn fleiri konur sagst vera stúlkan á myndinni.

Búast má við mikilli eftirspurn eftir nýju útgáfunni sem verður 60 x 80 sentímetrar og í 1850 eintökum.