Morgunblaðið sakað um að lána stjórnanda fé

Jón Ásgeir Jóhannesson, stjórnarformaður Baugs Group, sakar Morgunblaðið um tvískinnung í blaðinu í dag en hann segir að blaðið haldi því fram að Baugur hafi lánað fé til stjórnenda félagsins á sama tíma og Árvakur, útgefandi Morgunblaðsins hafi lánað einum stjórnenda sinna umtalsverðar fjárhæðir.

Jón Ásgeir gagnrýnir Morgunblaðið í grein í blaðinu í dag þar sem hann segir Morgunblaðið rangtúlka niðurstöður héraðsdóms á þann veg að blaðið gefi í skyn að háttsemi hans hafi falið í sér brot gegn ákvæðum hlutafélagalaga en hann hafi verið sýknaður vegna óskýrra refsiheimilda.

Jón Ásgeir segir þetta vera alrangt og að hvergi sé vikið að því í niðurstöðu dómsins að hann hafi brotið gegn hlutafélagalögum.

Jón Ásgeir sakar jafnframt Morgunblaðið um tvískinnung en orðrétt segir í grein Jóns Ásgeirs:

"Morgunblaðið hefur samkvæmt sundurliðun í ársreikningi sínum fyrir árin 2004 til 2005 lánað einum stjórnenda sinna umtalsverðar fjárhæðir."

Leitt hefur verið getum að því að hér eigi Jón Ásgeir við Styrmi Gunnarsson ritstjóra Morgunblaðsins en í fyrrgreindum ársreikningi er tiltekinn, undir öðrum skammtímakröfum, biðreikningur vegna S.G. upp á rösklega - þrjár komma átta milljónir - króna fyrir árið 2005. Sami reikningur hljóðar uppá röskar fimm komma þrjár milljónir króna fyrir árið 2004.

Einar Sigurðsson, framkvæmdastjóri Árvakurs, svaraði því ekki í samtali við Stöð 2 í dag hvort Árvakur hefði lánað Styrmi Gunnarssyni fé. Sjálfur neitaði Styrmir Gunnarsson að tjá sig um þetta mál í samtali við Stöð 2.

Einar Sigurðsson sendi fréttastofu Stöðvar 2 með tölvupósti í dag, svar við þeirri spurningu hvort Árvakur hefði gerst brotlegur við 104. gr. hlutafélagalaga. Þar er að hlutafélagi sé hvorki heimilt að veita hluthöfum, stjórnarmönnum eða framkvæmdastjórum félagsins eða móðurfélags þess lán né setja tryggingu fyrir þá.

"Ég get staðfest að mér vitanlega," segir Einar í tölvupóstinum, að "Árvakur hefur ekki veitt hluthöfum, stjórnarmönnum eða framkvæmdastjórum félagsins lán."