Heimili fyrir heimilislausa opnað á Njálsgötu

Velferðarráð Reykjavíkurborgar ákvað formlega í dag að hefja rekstur heimilis fyrir heimilislausa á Njálsgötu í Reykjavík. Ákveðið var að koma til móts við gagnrýnisraddir íbúa á Njálsgötu með því að hafa heimilismenn 8 en ekki 10 eins og áður var gert ráð fyrir. Þá er gert ráð fyrir öflugu samstarfi við lögreglu um vakt í hverfinu, að skapaður verði grundvöllur fyrir reglulegri samvinnu við nágranna heimilisins og að staðsetning heimilisins verði endurskoðuð að ári liðnu með tilliti til reynslunnar.

„Eins og fram hefur komið í fjölmiðlum eru skiptar skoðanir meðal íbúa við Njálsgötu og í næsta nágrenni um staðsetningu heimilisins. Lengi var leitað að hentugu húsnæði undir starfsemina áður en ákveðið var að festa kaup á húseigninni við Njálsgötu. Tvenn rök vógu þyngst í vali á húseigninni. Annars vegar að húseignin er miðsvæðis í bænum og hins vegar að í húsnæðinu var áður rekið gistiheimili þannig að húsið hefur verið innréttað sem slíkt og hentar því starfseminni vel. Brýn þörf er fyrir húsnæði fyrir heimilislausa í borginni.

Velferðarsvið Reykjavíkurborgar hefur þegar sent út bréf til íbúa við Njálsgötu og næsta nágrennis þar sem ákvörðunin er kynnt nánar.