Samfylkingin gaf mikið eftir í stjórnarviðræðunum

Samfylkingin hefur gefið mikið eftir í stjórnarviðræðum við Sjálfstæðisflokkinn að mati Guðna Ágústssonar, nýs formanns Framsóknarflokksins. Hann segir ríkisstjórn Sjálfstæðisflokks og Samfylkingar vera hægri stjórn og óttast einkavæðingu í heilbrigðiskerfinu og að Íbúðalánasjóður verði lagður niður. Þetta kom fram í máli Guðna í hádegisviðtali á Stöð 2. Hann spáir hörðum átökum innan ríkisstjórnarinnar á kjörtímabilinu.

Í viðtalinu sagði Guðni að honum þætti Samfylkingin hafa gefið undarlega mikið eftir í stjórnarviðræðum við Sjálfstæðisflokkinn. Sérstaklega miðað við þá sterku stöðu sem Ingibjörg var í eftir að upp úr slitnaði í viðræðum Framsóknarflokks og Sjálfstæðisflokks. Segir hann augljóst að Samfylkingin hafi gefið eftir heilbrigðisráðuneytið og óttast að með því að færa Íbúðalánasjóð undir fjármálaráðuneytið sé verið að stefna að því að leggja sjóðinn niður.

Guðni sagði hina nýju stjórn vera hreina hægri stjórn. Hann sagði einboðið að Guðlaugur Þór Þórðarson, nýskipaður heilbrigðisráðherra, muni hefja einkavæðing í heilbrigðisgeiranum og færa hann í átt til bandaríska kerfisins. Þá lýsti hann yfir áhyggjum vegna ætlunar ríkisstjórnarinnar að færa landgræðslu og skógrækt frá landbúnaðarráðuneyti til umhverfisráðuneytisins. Sagði hann þessi mál tilheyra bændum og að illa muni fara ef þau verði flutt.

Þá sagði Guðni ennfremur að hinn nýi stjórnarsáttmáli væri óljós og dularfullur. Mörg mál væru enn óuppgerð milli stjórnarflokkanna og telur hann þar af leiðandi miklar líkur á átökum seinna á kjörtímabilinu. Að mati Guðna hefur Sjálfstæðisflokkurinn færst nær Evrópusambandinu og segir hann yfirlýsingar ríkisstjórnarinnar um aukna umræðu um þau mál gefa vísbendingu um breytta afstöðu flokksins.

Guðni tók við embætti formanns Framsóknarflokksins í dag eftir að Jón Sigurðsson lét af embætti. Í viðtalinu sagðist Guðni vissulega hafa viljað taka við formannsembættinu undir öðrum kringumstæðum. Næstu skref hjá flokknum væri að velja nýjan varaformann og safna kröftum fyrir komandi kjörtímabil.