Mikil neyð í Pakistan eftir flóð

Mikill skortur virðist vera á neyðaraðstoð í þeim héruðum í vesturhluta Pakistans sem hafa orðið illa úti af völdum flóða undanfarna daga. Fram kemur á fréttavef BBC að yum 800 þúsund manns eigi um sárt að binda vegna flóanna í Balúkistanhéraði í suðvesturhluta landsins en hundruð þúsunda heimila hafa eyðilagst.

Flóðin má rekja til mikillar úrkomu sem fylgdi fellibyl sem gengið hefur yfir vesturhluta landsins og Afganistan. 20 manns eru sagðir hafa látist í Balúkistan og þá eru 70 til viðbótar sagðir látnir í héraði við landamæri Afganistans í norðvesturhluta Pakistans. Áttatíu eru svo látnir í Afganistan af völdum hamfaranna.

Haft er eftir fréttamönnum BBC á svæðunum að sum héruð séu mjög illa farin og hafa bæði rafmagslínur og vegir eyðilagst. Enn fremur hafa vatnsból spillst vegna flóðanna og þá fljóta rotnandi hræ dýra um með tilheyrandi óþef. Við þetta bætist kæfandi hiti upp á 40 gráður. Mestum skaða olli flóð sem varð þegar vatn flæddi yfir stíflu í suðvesturhluta landsins og hefur fólk leitað skjóls í skólum og moskum.

Pakistanski herinn hefur flutt hjálpargögn á flóðasvæðin með þyrlum en íbúar á svæðunum eru óánægðir með hversu hægt það gengur. Þannig réðst hópur fólks inn á opinberar skrifstofur og lögreglustöðina í borginni Turbat í suðvesturhluta landsins til þess að láta í ljós reiði sína. Lögregla beitt táragasi gegn hópnum og særðust þrír í átökum.