Komin með alveg nóg af Paris Hilton

Mika Brzezinski, einn kynna morgunþáttarins Morning Joe á MSNBC sjónvarpsstöðinni neitaði að segja frá því að djammdrottningunni hefði verið sleppt úr fangelsi á undan fréttum um mannfall í Írak og stjórnmál.

,,Ég þoli ekki þessa sögu, og finnst ekki að þetta eigi að vera fyrsta fréttin" sagði þulurinn við áhorfendur í fyrsta fréttatíma morgunsins

Ekki leist henni betur á fréttina í næsta fréttatíma. Brzezinski neitaði að lesa handritið, og endaði með að teygja sig í kveikjara annars kynnisins og reyna að kveikja í handritinu áður en hún krumpaði það saman.

Í þriðja fréttatímanum var hún endanlega búin að fá nóg, og stóð upp, gekk að tætaranum og tætti handritið.

Fleiri en 250 þúsund manns hafa horft á upptöku af þættinum á YouTube, og hafa margir hrósað Brzezinski fyrir framtakið.