Staðfestu rétt dæmds nauðgara til kláms

Dæmdir kynferðisafbrotamenn í Svíþjóð mega skoða klámblöð að vild. Þetta segja þarlendir dómstólar, sem komust að þeirri niðurstöðu að sænsku fangelsismálastofnuninni væri ekki stætt á því að neita dæmdum nauðgara um klámblöðin hans.

Fangelsisyfirvöld héldu því fram að lestur klámblaða myndi trufla endurhæfingu mannsins. Þá sögðu þau að blöðin væru mögulega hættuleg öryggi starfsfólks og annarra fanga, þar sem þau ykju líkurnar á því að maðurinn bryti af sér aftur.

Rétturinn sagði hinsvegar að stofnunin hefði ekki getað sýnt fram á það með óyggjandi hætti að blöðin ógnuðu öryggi hennar. Fangelsisyfirvöld hafa beðið stjórnvöld að breyta lögum, svo þau geti haldið áfram að banna klámefni.

,,Klámnotkun eykur líkur á árás á aðra fanga og er stuðandi fyrir starfsfólk" sagði Elisabeth Kwarnmark, fangelsissálfræðingur um úrskurð réttarins.