Vilhjálmur og Kate byrjuð saman aftur

Vilhjálmur bretaprins og Kate Middleton eru byrjuð saman aftur ef marka má bresku pressuna, sem hefur smjattað á málinu um helgina.

Prinsinn og Middleton hættu saman í apríl eftir margra ára samband. Orðrómur um að þau hefðu tekið saman aftur fór á flug þegar þau sáust saman í samkvæmi í herbúðum Vilhjálms í Dorset fyrr í mánuðinum. Breska blaðið News of the World segir að þar hafi þau dansað og kysstst og að lokum farið saman til herbergis Vilhjálms.

Parið kynntist í St. Andrews háskólanum árið 2001 og byrjaði saman í lok árs 2003. Fastlega var búist við því að þau myndu gifta sig, og því kom það á óvart þegar þau tilkynntu sambandsslit sín í apríl síðastliðnum.

Heimildamenn blaðsins segja að Vilhjálmur sé enn afar ástfanginn af Kate og að enginn í konungsfjölskyldunni yrði hissa á því ef þau byrjuðu saman aftur.

Vilhjálmur bauð Kate að vera viðstödd minningartónleika um móður hans á sunnudaginn næstkomandi og þremur vikum síðar mætir Vilhjálmur í brúðkaup hjá frænku Kate. Að sögn vina mun hún nota þessi tvö tækifæri til að meta hvort hún sé tilbúin til að hefja sambandið formlega aftur.