Paris Hilton er þakklát fyrir litlu hlutina í lífinu

Paris Hilton segir að fangelsisvistin hafi gert hana þakklátari fyrir litlu hlutina í lífinu.

Hótelerfinginn á nú einungis nokkra daga eftir af fangelsisdómi sem hún hlaut fyrir að brjóta skilorð með því að keyra án ökuréttinda.

,,Ég er mikið þakklátari fyrir allt sem ég fæ núna, hvort sem það er koddi til að sofa með eða matur eða hvað sem er" sagði Hilton í símaviðtali við Ryan Seacrest fyrir E! Online.

Hún viðurkennir þó að vistin sé ekki auðveld. ,,Ég þjáist af innilokunarkennd, og klefinn minn er mjög lítill. Þetta er erfitt. Það er ekkert að gera nema sitja." ,,Ég var að verða smá klikkuð fyrstu dagana, en ég er að venjast þessu"

Hilton hóf afplánun 2. júní síðastliðinn. Yfirvöld hafa sagt að hún þurfi einungis að afplána 23 daga af 45 daga dómi sínum og ætti henni samkvæmt því að verða sleppt á sunnudag eða mánudag.

,,Ég get ekki beðið eftir að sjá fjölskylduna mína og borða góða máltíð, sofa í mínu eigin rúmi og vera þakklát fyrir alla hlutina sem ég tók sem sjálfsögðum og velti lítið fyrir mér." sagði Hilton.