Vill að Amy Winehouse semji næsta Bond-lag

Tónskáldið David Arnold, sem séð hefur um tónlistina í síðustu fjórum Bond-myndunum vill fá vandræðabarnið Amy Winehouse til að semja næsta Bond-lag.

Arnold segir að Winehouse, sem er þekktust fyrir lag sitt Rehab, drykkjulæti og skrautlega hegðun, hafi einmitt röddina og tónsmíðahæfileikana til að feta í fótspor þeirra heimsfrægu listamanna sem hafa samið lög fyrir spæjaramyndirnar.

Sá orðrómur komst á kreik í fyrra að Winehouse hefði samþykkt að semja lag fyrir 22ra Bond-myndina, sem áætlað er að frumsýna í nóvember á næsta ári, en Arnold neitar því. ,,Amy Winehouse átti bestu plötu síðasta árs. Ég hef ekki spurt hana ennþá, en ég held að hún væri góð í verkið"