Fær bætur fyrir að bera brjóstin

Ung kona sem var handtekin fyrir að spóka sig berbrjósta á götum New York fær tæpar tvær milljónir í bætur frá borginni.

Jill Coccaroo, 27 ára listamaður, var þann fjórða ágúst árið 2005 á listasýningu í East Village. Henni varð heitt, og brá á það ráð að leysa niður um sig efri hluta samfestings sem hún var í, og tölta svo um ber að ofan til að kæla sig.

Um hálf tvö að nóttu stöðvaði lögregla hana og krafðist þess að hún klæddi sig aftur, sem hún neitaði og vísaði í dóm sem féll árið 1992 um að konur hefðu sama rétt og karlar til að vera berar að ofan.

Hún sagði við New York Post að lögreglumaðurinn hafi þá dregið sig á hárinu inn í bíl og flutt hana á lögreglustöð þar sem henni var haldið í tólf tíma áður en hennir var sleppt án ákæru.

Coccaroo, sem nú gengur undir nafninu Phoenix Fee Ley, kærði borgina í október fyrir ólöglega handtöku. Sátt náðist um bætur í byrjun júní, án þess þó að borgin viðurkenni sök.