Stefnir í drullubað á Glastonbury

Gangi spár eftir verður rigning á Glastonbury hátíðinni í ár.

,,Vikan verður vætusöm, svo þetta verður sami drullupytturinn og venjulega" sagði veðurfræðingurinn Stewart Wortley við BBC.

Upphafsmaður hátíðarinnar, Michael Eavis mun opna hlið landareignar sinnar í Somerset fyrir hátíðargestum á miðvikudag en hátíðin sjálf stendur frá föstudegi til sunnudags.

Hann segir að miklar endurbætur hafi verið gerðar til að koma í veg fyrir vandamál tengd votviðrinu, sem er því sem næst árviss viðburður.

,,Við höfum líklega eytt um tólf milljónum í flóðaviðbúnað og endurbætur á fráveitukerfi og allt það" ,,Risavaxnar steyptar pípur sjá um að veita vatninu af svæðinu og út í á" ,,Við hlökkum eiginlega til rigningarinnar, þá getum við séð hvernig kerfið virkar"

Fyrir tveimur árum fóru fleiri en 400 tjöld í kaf, þegar stormur gekk yfir Somerset á opnunardaginn. Á innan við tveimur tímum féll jafn mikil úrkoma og yfirleitt á einum mánuði. Í ár er frekar gert ráð fyrir skúrum en úrhelli.