Hasselhoff hafði betur í réttarsalnum

Strandvörðurinn David Hasselhoff endurheimti á dögunum forræði yfir dætrum sínum eftir langa og stranga forsjárdeilu við fyrrum eiginkonu sína. David og kona hans fyrrum Pamela Bach höfðu áður deilt forræði yfir táningsstúlkum þeirra Hayley og Taylor-Ann.

Málið hófst eftir að vafasamt myndband barst á netið fyrr á þessu ári. Í því birtist Hasselhoff áhorfendum í mikill áfengisvímu að snæða ostborgara sitjandi á gólfinu. Í bakgrunni heyrist í annarri dótturinni. Í kjölfar þessa var Hasselhoff sviptur forræðinu og settur í tveggja vikna nálgunarbann við dæturnar.

Annars er það að frétta af Hasselhoff að hann er nýkominn úr áfengismeðferð og býr í Nevada í Bandaríkjunum. Hann leikur þessa dagana í þáttunum The Producers og sinnir dómgæslu í hinum geipivinsælu þáttum America's Got Talent.