Daglegar gönguferðir með leiðsögn

Í sumar býður Bláa lónið í samvinnu við leiðsögumenn Reykjaness upp á daglegar gönguferðir um svæðið hjá Bláa lóninu. Gönguferðirnar eru farnar daglegar klukkan 10:00 tímabilið 1. júní til 31. ágúst.

Orkuríkt umhverfi Bláa lónsins, jarðfræði og saga er meðal þess sem þátttakendur í daglegum gönguferðum munu kynnast. Ferðirnar hefjast við Bláa lónið þaðan sem gengið er að lækningalindinni. Gengið er að Rannsókna- og þróunarsetri og að orkuveri Hitaveitu Suðurnesja í Svartsengi. Gangan endar í Bláa lóninu.

Edda Gísladóttir, markaðsstjóri Bláa lónsins sagði í samtali við Vísi.is að þetta væri í fyrsta skiptið sem Bláa lónið byði uppá þessa göngu og ætlunin væri að bjóða upp á hana daglega í allt sumar. „Við bindum miklar væntingar með að þetta geti þróast frekar, en á Bláa lónið á sér mjög skemmtilega sögu þar sem að orka, vísindi og náttúran spila veigamikið hlutverk." Einnig hefur Reykjanesskaginn upp á ótrúlega margt að bjóða, allt frá fornum minjum um búsetu frá upphafi norræns landsnáms til vorra tíma, fornar þjóðleiðir, síbreytilega náttúrufegurð og jarðhitasvæði. Gangan hefur verið vel sótt, bæði af erlendum gestum og Íslendingum og mjög margir eru að spyrjast fyrir.

Gönguferðin tekur um eina og hálfa klukkustund. Mælt er með gönguskóm og hlýjum fatnaði. Verð kr. 1.000. Miðar eru seldir í gestamóttöku Bláa lónsins.

Skoða má frekari upplýsingar um gönguna hjá Bláa lóninu hér: http://www.bluelagoon.is/Blaa_lonid/Gonguferdir/