Kevin Spacey orðinn leiður á Hollywood

Hollywoodleikarinn Kevin Spacey er orðinn þreyttur á því að leika í kvikmyndum. Í samtali við London Tonight sagði hann að hann nyti sín vel sem listrænn leikstjóri í Gamla Viktoríuleikhúsinu í Lundúnum. Hann hefur starfað þar síðan 2003.

 

 

„Mér er alveg sama um leiklistarferilinn minn núna. Ég er búinn að fá nóg," segir Spacey. Hann segir að eftir að hafa átt 10 ára farsælan feril í kvikmyndagerð hafi hann þurft að spyrja sig hvernig hann ætti að nýta alla þá velgengni sem hann hefði öðlast. Nú sé hann orðinn þreyttur á að vinna við kvikmyndir og vilji starfa með fólkinu í Viktoríuleikhúsinu.

 

 

Spacey hlaut Óskarsverðlaun fyrir leik sinn í myndinni American Beauty, sem kom út árið 1999.