Hætta á eldgosum á Reykjanesi kallar á varaflugvöll sunnanlands

Flutningur innanlandsflugsins til Keflavíkur skilar einna mestum þjóðhagslegum ábata, að mati flugvallarnefndar. Nefndin telur hlutverk Reykjavíkurflugvallar sem varaflugvallar fyrir Keflavík þó það mikilvægt að byggja verði upp nýjan varaflugvöll á suðvesturhorninu, verði Vatnsmýrin tekin undir annað, þar sem varaflugvöllur í Reykjavík spari töluvert fé fyrir flugrekstur og hafi auk þess mikla þýðingu fyrir öryggi flugsamgangna. Einnig þurfi að hafa í huga mögulega náttúruvá. Fékk flugvallarnefnd því Íslenskar orkurannsóknir til að meta líkur á eldgosi á Reykjanesskaga. Niðurstaðan var að líkur á eldgosi þar á næstu 50 árum geti verið allt að tíu prósent. Ekki er talið ljóst hvaða áhrif eldgos hefði á. Hætta á að hraunrennsli teppi vegasamgöngur milli Reykjavíkur og Keflavíkur er ekki talin mikil. Hins vegar geti öskugos á Reykjanesi haft truflandi áhrif á flug. Með hliðsjón af þessu reiknar flugvallarnefnd því með því í sinni skýrslu að Bakkaflugvöllur í Landeyjum verði stækkaður og byggður upp sem varaflugvöllur, ef innanlandsflugið flyst til Keflavíkur.