Frekari rannsóknir þarf fyrir nýjan Reykjavíkurflugvöll

Reykjavíkurflugvöllur er á mjög góðum stað frá sjónarmiði flugsamgangna og flugrekenda. Flugvallarsvæðið er hins vegar mjög dýrmætt sem byggingarland. Þjóðhagslegir útreikningar sýna að flugvöllur á Hólmsheiði, Lönguskerjum eða flutningur innanlandsflugs til Keflavíkurflugvallar muni skila miklum ábata. Þetta er niðursstaða skýrslu samráðsnefndar samgönguráðherra og borgarstjóra um framtíðarkosti Reykjavíkurflugvallar um framtíð Reykjavíkurflugvallar, sem var birt í dag.

Helgi Hallgrímsson, formaður samráðsnefndarinnar, og aðrir kynntu nefndarmenn skýrsluna á blaðamannafundi.

Í skýrslunni kemur fram að til að unnt sé að ákvarða hvort mögulegt sé og hagkvæmt að reisa nýjan flugvöll á Hólmsheiði eða Lönguskerjum þurfa að fara fram ýtarlegar veðurfarsrannsóknir. Þær hófust í fyrra á Hólmsheiði en taka þarf fleiri atriði til athugunar en gert hefur verið, segir í frétt Samgönguráðuneytisins.

Þar segir líka að rannsaka þurfi veðurfar á Lönguskerjum og á báðum stöðum þurfi að meta umhverfisáhrif af flugvallargerðinni og væntanlegri starfsemi.

Samgönguráðuneytið lítur svo á að áfram skuli haldið samstarfi borgaryfirvalda og samgönguyfirvalda varðandi framtíðarskipan innanlandsflugsins. Settur verði á laggirnar vinnuhópur sem leggi fram tillögur um tilhögun, kostnað og verkáætlun nauðsynlegra rannsókna á veðurfari og umhverfisáhrifum sem áður er getið. Nauðsynlegt er að þær tillögur verði mótaðar á næstu vikum til að unnt sé að hrinda rannsóknum af stað þegar í haust. Samgönguráðuneytið telur farsælast að þeir sem skipuðu samráðsnefndina starfi áfram að frekari framvindu málsins og segir í tilkynningunni að á meðan verði Reykjavíkurflugvöllur í Vatnsmýri miðstöð innanlandsflugs eins og verið hafi í áratugi.